De regions europeiches nasciudes do la Segonda viera n iel truepes. Nëus vivon tla region europeica Tirol-Südtirol-Trentin (Euregio). Carateristich per nëus iel che son liei sëura i cunfins ora da n liam storich y culturel.

L obietif dl’Euregio ie l sustëni de na culaburazion che va sëura i cunfins ora. Ndesfidedes mpurtantes dëssa unì afruntedes deberieda. Perchël uel la trëi pertes dl’Euregio, l Tirol, l Südtirol y l Trentin lauré deberieda per jì adum sun una na streda ti ciamps dl trafich, dl’economia, dla istruzion, dla sanità y dla cultura. 

L’Euregio à na si nduneda, pra chëla che la reprejentantes y i reprejentanc dla trëi pertes se anconta regulermënter. La nduneda vën meneda ufizielmënter dala Presidënta/dal Presidënt dl’Euregio. La presidënza vën barateda ju danter i presidënc/la presidëntes dla trëi pertes dla region europeica. La sënta dl’Euregio ie a Bulsan (Südtirol).

L Presidënt dl’Euregio ie tl mumënt l Presidënt dl Trentin Maurizio Fugatti y la Secretera generela ie la dut.sa Marilena Defrancesco.

L’Austria y la Talia ie tla Union europeica, che ie tl mumënt metuda adum da de ndut 27 stac cumëmbri. La Union europeica se mpënia acioche l’Europa y si stac cumëmbri crësce adum deplù nce per ti jì plu daujin y seguré la pesc sun nosc cuntinënt (Nsci dëssel sun nosc cuntinënt unì segurà la pesc y l bënsté). Tla Union europeica reprejentea l’ Euregio i nteresc transfruntalieres partii dala trëi pertes dl teritore. Per chësc fin iel dal 1995 n ufize dla Euregio a Bruxelles.

L’Euregio mët a jì truep proiec deberieda danter l Tirol, l Südtirol y l Trentin. Chisc proiec fej ancunté persones y duta la trëi pertes dl Tirol storich possa prufité dal barat de savëi y esperienzes. L majer de duc i proiec ie bonamënter la costruzion dl tunel de basa dl Prëner (BBT), che dëssa trasferì l trafich sëura l Prëner dala streda ala scines. Ma l ie nce truep de mëndri proiec – dantaldut nce per i pitli y jëuni. Per ejëmpl iel l Euregio-festival dla junëza, l Euregio Sportcamp, l cuncors de mujiga UploadSounds y l’Olimpiada dla segurëza di mutons/dla mutans.

Per chësc duvier iel de bujën de n computer, de n tablet o de n smartphone cun cunliamënt al internet.

1. Lijëde tres avisa la plata internet “Cie ie pa l’Euregio?”.
2. Fajëde po na descuscion te tlas sun cie che ëis mparà sun l’Euregio.
3. Scumencëde śën cun l quiz online per udëi sce sëis bën nfurmei sciche l toca.
4. Elaburëde śën deberieda n pez dl puzzle dla cherta dla Euregio. Coche chësc ie da fé abinëis ora pra la pert dl puzzle numer 1.

(Cunsià dala cuinta tlas inant)

Tl internet pudëis mo nriescer scialdi deplù sun la region europeica Tirol. L’Euregio à na si plata web sun chëla che la se prejënta. La plata web ie azessibla tres l’adres www.europaregion.info. Iló pudëis abiné truepa zifres nteressantes, dac y fac sun l’Euregio. Da chësta plata pudëis jì a ti cialé a truepa d’autra nfurmazions sun la region europeica.

Per chësta ncëria de lëur adurvëis n computer, n tablet o n smartphone cun cunliamënt al internet.

1. Nfurmëve sciche toca n cont dla region europeica sun la plata web www.europaregion.info.
2. Fajëde pona na descuscion te tlas y baratëve ora cie che ëis mparà sun la region europeica.
3. Scumencëde śën cun l quiz online per udëi sce savëis bën nëut n cont dl’Euregio.
4. Elaburëde śën deberieda la pert 1 dl puzzle dla cherta dl’Euregio. Coche chësc ie da fé pudëis nriescer pra la pert 1 dl puzzle.