VIRE BUN“: CI Ó PA DÍ CHËL?

Ci ó pa dí por te „vire bun“? Ci ó pa dí por te avëi na bona cualité de vita? Cares é pa les cosses che cunta deplü? Pënsa sura sön chëstes domandes.

Chir sëgn fora 5 faturs che da te infora á le majer influs sön la cualité dla vita.

Consëi: sce te mëtes le mouse sön les imajes singoles vëgnel fora n valgönes informaziuns de jogn y jones sciöche tö. Ai/Ares te daidará capí damí ciodí che chisc faturs ti sá d’importanza.

Confrontëia tüa classifica personala cun i resultac che é gnüs fora dessura.
É i faturs nominá dales porsones intervistades anfat a chi che tö arates i plü importanc?

NB: Chiló n’él nia „dërt“ o „falé“. Vignun y vignöna á süa minunga personala sön ci che al ó ester por na bona cualité dla vita.

Confrontede te classa ostes minunghes y alzede fora les manires da odëi che se somëia y chëres che é en contraposiziun.

FOCUS ALIMENTAZIUN

I jun inant te chësc modul cun na pert che aprofondësc la tematica dl’alimentaziun che é dër importanta por cotan de jogn y jones.

Al é important da mangé (indortöra)!
Fajede na discusciun te classa sön ci che al ó dí n’alimentaziun sana y coreta por na miú cualité de vita:

  • Ci él pa miné cun „na bona alimentaziun“? Él ma important da „avëi assá da mangé“ (por sodesfá n bojëgn de basa) o él ince important mangé „bun/indortöra“?
  • A ci ciarëise pa canche i jëis a cumpré ite te botëga? A ci ti dëise pa plü importanza?

 

Liede chëstes domandes y fajede na discusciun te classa:

  • Ci sorts de ordöra ne vëgn pa nia coltivades o ne crësc pa nia tl’Euregio?
  • Olá vëgn pa chëstes sorts coltivades? Co röia pa chësta ordöra te nostes botëghes? Ciodí mineste pa che tröpes sorts de ordöra é da ciafé da cumpré döt l’ann? (Por ej. ciafon da cumpré pieries ince d’invern)?

Consëi: tolede na cherta geografica y localisede cun l’aiüt de osta insegnanta o osc insegnant i paisc y les regiuns da olache al vëgn i früc che i ëis ion.

N BEL DILEMA!

Al é gonot ri da tó na dezijiun tla vita. Datrai messunse afronté dilemesc olache al n’é nia saurí da ciafé na soluziun. Les porsones che vëgn dant tles stories chiló dessot nes cunta de sües dificoltés da capí ci che al foss damí da chirí fora. Ara nen vá tres ciamó dl’alimentaziun.

Fajede grups de 3-4 porsones.
Chiride fora öna dles trëi stories suandëntes y liedela avisa. Spo porvede da ponsé ci che os fajesses te na te situaziun. Arjignede ca n pice jüch de rodi te chël che i portëis dant le problem te na manira creativa y porvëis da ciafé na soluziun.

Important: ciarede che vigni grup ais n’atra storia.

Presentede la scena ala classa y valutede spo deboriada ci vantaji y ci risć che osta dezijiun á.

Fajede na discusciun cun l’aiüt de chëstes domandes:

  • Nos sciöche porsones privates y consumadësses y consumadus podun porté pro cun nostes aziuns y nostes pices usanzes da vigni de ala sconanza dl planët. Che porta pa ciamó responsabilités de chësc vers?
  • Ponsede a ci mosöres che les porsones che laora tla politica o manajëia aziëndes podess tó por fá a na moda che al vëgnes cumpré produc regionai?

Transfer/Segurëza = “COPIES CHE NE VÁ NIA ADÖM”

Tres le jüch de rode sëise gnüs sura che les cosses che pó ester d’importanza por na porsona pó avëi a tëmp lunch ince na faziun negativa por zacai d’atri. Insciö sciöche al pó ester datrai dilemesc por vignun de nos nen él ince a liví desvalis tl’Euregio. L’obietif dl’Euregio é chël da garantí a dötes sües abitantes y a düc sü abitanc na bona cualité de vita, mo ara mëss ince le fá te na manira sostignibla y tl respet dl ambiënt incëria, por ti lascé na bona cualité de vita sciöche arpejun ales generaziuns che vëgn. Ince la politica mëss tó dezijiuns danter döes alternatives che la mët sovënz dan dilemesc analogs.

Chiló dessot él na lista de obietifs a chi che l’Euregio ti vá do. I ves intenarëise atira tan ri che al é da orëi nen arjunje dui te n iade.
Proa da ciafé les copies che ne vá nia adöm. Tira i cadrí de test grisc tl dër ciamp dla corona zentrala. Ala fin odaraste sön vigni riga dui obietifs che al é ri da fá jí adöm.

CHEDER GENERAL

Al n’é nët nia saurí da ti pité ales porsones l’oportunité de n cer bëgnester y tl medemo tëmp ciaré dl planët acioche ince nüsc mituns y nostes mitans pois vire te n ambiënt sann. Al ó ester la capazité da intermedié danter posiziuns desvalies y da fá jí adöm obietifs gonot contrastanc. I ëis capí tan che chëstes tematiches ne se stá nia ma a nos a cör, mo ince al’economia, ala politica y i.i.. Mo i ëis ince esperimenté che al n’é nia saurí da ciafé na soluziun a dilemesc che vëgn tres indô sö danü. Tl proscim modul arëise la poscibilité da baié de üsc proiec y da svilupé ostes idees por aumenté la cualité de vita tl’Euregio, incö y tl dagní! I ne aspetun nia l’ora da aldí ci che i ëis da dí!

REALISEDE OSC TOCH DE PUZZLE

Personalisede le nono toch de puzzle cun ostes descurides. Lascede jí osta creativité: ci ves á pa dé da ponsé? Ci ëise pa imparé dai jüc de rode?