Sciöche i savëis bele é un di obietifs dl’Euregio, che le Südtirol, le Trentin y le Tirol laores deboriada ince ti ciamps dl trafich y dla mobilité. Al n’é nia dagnora saurí ajache ti ultims agn él tres de plü auti y camions che passa ia le confin. Ince le coliamënt sura le Prener é atoché. Les porsones tl’Euregio y les istituziuns desvalies reagësc a na moda desvalia. Ares á minunghes desvalies sön vantaji y desvantaji y por chësta rajun él sovënz ri da ciafé soluziuns che vá ince bun por düc. Porchël é ince la colaboraziun tl’Euregio dër importanta te chësc ciamp.

Te chësc modul poste te dé jö plü avisa cun na desfida por l’Euregio tl ciamp dla mobilité. Te impares da conësce punc de odüda desvalis che al é tles perts dla provinzia desfarëntes y pënses sura deboriada cun d’atres porsones ci soluziuns che al podess ester. Te odaras che sovënz n’él nia na miú soluziun y al n’é nia tan saurí da mëte adöm punc de odüda desvalis. I se la inconfortun da odëi üsc resultac!
 

Sciöche i ëis bele odü é le passaje de camions sura le Prener ia na gran desfidada por l’Euregio Tirol – Südtirol – Trentin. Te n jüch de rode podëise ti jí do plü avisa a chësc tema. 

 Imaginesse: Osta classa vëgn inviada dala “Televijiun Ladina” a na discusciun tla televijiun. I savaiëis da ester porsones che á minunghes dër desvalies sön chësc argomënt. Dötes les porsones á val’ da nen fá cun chësc tema y é atocades atramënter. 

 La domanda zentrala de chëra che al vëgn baié tla televijiun é: 

“Co dessera pa jí inant cun le transit de camions sura le Prener ?“

Preparaziun y desfiramënt:  

1. Formede 4-5 grups por la preparaziun y ciarede che al sides alplü danter 3 y 5 scolars/scolares te n grup.  Dui scolars/Döes scolares pó surantó la moderaziun (=mené la discusciun).
2. Le grup ciafa chertes de rodi desvalies trates ala niza. Liesse jö indortöra ti grups la cherta de rode y porvede da stlarí i punc che i ne ëis nia capí cun l’aiüt de osta maestra/osc maester. Formulede argomënc cun chi che i ti sëis da rapresenté bun osta minunga tla discusciun. 
3. Chiride fora zacai dl grup che toles pert sciöche espert/esperta ala trasmisciun. De vigni grup él ma un n scolar/öna na scolara che pó jí sön paladina. Ajache döta la jënt inviada te studio á minunghes desvalies, él important che chësta porsona lasces da na pert por la dorada dla trasmisciun süa minunga y rapresentëies coscientamënter le punt d’odüda de so rode. 
4. Sön paladina sarál n scagn lëde olache na porsona dl publich po se senté, sce ara ó baié para y dí val’ d’important. Ara pó sté sentada sön le scagn ghest cina che ara/al á dit döt o cina che n’atra porsona dl publich ó se senté sön le scagn a dí la süa.  
5. Fajede le jüch de rode y porvede da ciafé adöm na resposta ala domanda “Co dessera pa jí inant cun le transit de camions sura le Prener?” I moderadus/Les moderadësses mëna la discusciun y ciara che dötes les porsones pois dí la süa. Baratesse fora osta minunga. Argomentede cun cherianza y ogetivamënter y jide ite sön i argomënc dles atres porsones 

Baratesse fora ostes minunghes y realisede adöm le toch de puzzle por la cherta dl’Euregio!